SNE NETWORK.MOHALI.
ਦਰਦਨਾਕ ਹਾਦਸੇ ‘ਚ ਮਾਂ-ਪੁੱਤ ਦੀ ਮੌਤ ਹੋ ਗਈ। ਇਹ ਹਾਦਸਾ ਲਾਂਡਰਾਂ ਚੌਕ ਮੁੱਖ ਸੜਕ ‘ਤੇ ਸਥਿਤ ਗੁਰਦੁਆਰਾ ਸਾਹਿਬ ਦੇ ਬਿਲਕੁਲ ਸਾਹਮਣੇ ਵਾਪਰਿਆ। ਇੱਥੇ ਇੱਕ ਤੇਜ਼ ਰਫ਼ਤਾਰ ਡਸਟਰ ਕਾਰ ਚਾਲਕ ਨੇ ਸੜਕ ਕਿਨਾਰੇ ਖੜ੍ਹੇ ਇੱਕ ਹੀ ਪਰਿਵਾਰ ਦੇ 3 ਲੋਕਾਂ ਨੂੰ ਟੱਕਰ ਮਾਰ ਦਿੱਤੀ। ਇਸ ਹਾਦਸੇ ‘ਚ ਮਾਂ-ਪੁੱਤ ਦੀ ਮੌਤ ਹੋ ਗਈ। ਇਸ ਦੌਰਾਨ ਪਤੀ ਜ਼ਖ਼ਮੀ ਹੋ ਗਿਆ ਅਤੇ ਮੁਹਾਲੀ ਦੇ ਫੇਜ਼-6 ਦੇ ਸਿਵਲ ਹਸਪਤਾਲ ਵਿੱਚ ਜ਼ੇਰੇ ਇਲਾਜ ਹੈ। ਮ੍ਰਿਤਕਾਂ ਦੀ ਪਛਾਣ ਪ੍ਰਭਜੋਤ ਕੌਰ (28), ਮਨਰਾਜ (7) ਅਤੇ ਜ਼ਖ਼ਮੀ ਜੋਬਨਜੀਤ ਸਿੰਘ (29) ਵਾਸੀ ਪਿੰਡ ਡਵਾਲੀ ਜ਼ਿਲ੍ਹਾ ਰੋਪੜ ਵਜੋਂ ਹੋਈ ਹੈ। ਇਹ ਪਰਿਵਾਰ ਚੰਡੀਗੜ੍ਹ ਦੇ ਸੈਕਟਰ-40ਬੀ ਵਿੱਚ ਰਹਿੰਦਾ ਹੈ।
ਜਾਂਚ ਅਧਿਕਾਰੀ ਏਐਸਆਈ ਮੇਜਰ ਸਿੰਘ ਨੇ ਦੱਸਿਆ ਕਿ ਮੁਲਜ਼ਮ ਕਾਰ ਚਾਲਕ ਮੌਕੇ ’ਤੇ ਹੀ ਗੱਡੀ ਛੱਡ ਕੇ ਫ਼ਰਾਰ ਹੋ ਗਿਆ ਸੀ। ਪੁਲੀਸ ਨੇ ਕਾਰ ਨੂੰ ਕਬਜ਼ੇ ਵਿੱਚ ਲੈ ਲਿਆ ਹੈ। ਡਰਾਈਵਰ ਖ਼ਿਲਾਫ਼ ਥਾਣਾ ਸੋਹਾਣਾ ਵਿੱਚ ਧਾਰਾ 89 ਤਹਿਤ ਕੇਸ ਦਰਜ ਕਰ ਲਿਆ ਗਿਆ ਹੈ। ਕਾਰ ਚਾਲਕ ਦੀ ਭਾਲ ਕੀਤੀ ਜਾ ਰਹੀ ਹੈ। ਜੋਬਨਜੀਤ ਸਿੰਘ ਦੀ ਪਤਨੀ ਪ੍ਰਭਜੋਤ ਕੌਰ ਆਪਣੇ ਲੜਕੇ ਮਨਰਾਜ ਨਾਲ ਆਪਣੇ ਨਾਨਕੇ ਪਿੰਡ ਡਵਾਲੀ ਗਈ ਹੋਈ ਸੀ। ਜੋਬਨਜੀਤ ਸਿੰਘ ਆਪਣੀ ਪਤਨੀ ਅਤੇ ਪੁੱਤਰ ਨੂੰ ਸਹੁਰੇ ਘਰ ਤੋਂ ਲੈਣ ਗਿਆ ਸੀ। ਸੋਮਵਾਰ ਉਹ ਆਪਣੀ ਪਤਨੀ ਅਤੇ ਬੇਟੇ ਨੂੰ ਸਹੁਰੇ ਘਰ ਤੋਂ ਮੋਟਰਸਾਈਕਲ ‘ਤੇ ਚੰਡੀਗੜ੍ਹ ਲੈ ਕੇ ਆ ਰਿਹਾ ਸੀ। ਉਹ ਲਾਂਡਰਾਂ ਨੂੰ ਜਾਂਦੀ ਮੁੱਖ ਸੜਕ ’ਤੇ ਗੁਰਦੁਆਰਾ ਸਾਹਿਬ ਨੇੜੇ ਰੁਕਿਆ। ਜੋਬਨਜੀਤ ਸਿੰਘ ਮੋਟਰਸਾਈਕਲ ਸਟੈਂਡ ਲਗਾ ਰਿਹਾ ਸੀ ਅਤੇ ਪਰਮਜੀਤ ਕੌਰ ਆਪਣੇ ਲੜਕੇ ਮਨਰਾਜ ਦਾ ਹੱਥ ਫੜ ਕੇ ਸੜਕ ਕਿਨਾਰੇ ਖੜ੍ਹੀ ਸੀ। ਉਸੇ ਸਮੇਂ ਇਕ ਤੇਜ਼ ਰਫਤਾਰ ਡਸਟਰ ਕਾਰ ਨੇ ਆ ਕੇ ਤਿੰਨਾਂ ਨੂੰ ਟੱਕਰ ਮਾਰ ਦਿੱਤੀ।
ਔਰਤ 10 ਫੁੱਟ ਛਾਲ ਮਾਰ ਕੇ ਬੋਨਟ ‘ਤੇ ਡਿੱਗੀ, ਸਰੀਰ ਦੇ ਦੋ ਟੁਕੜੇ ਹੋ ਗਏ
ਸੀਸੀਟੀਵੀ ਫੁਟੇਜ ਮੁਤਾਬਕ ਡਸਟਰ ਕਾਰ ਦੀ ਰਫ਼ਤਾਰ ਬਹੁਤ ਤੇਜ਼ ਸੀ। ਜਿਵੇਂ ਹੀ ਕਾਰ ਨੇ ਸੜਕ ਕਿਨਾਰੇ ਖੜ੍ਹੇ ਪਰਿਵਾਰ ਨੂੰ ਟੱਕਰ ਮਾਰੀ ਤਾਂ ਪਰਮਜੀਤ ਕੌਰ 10 ਫੁੱਟ ਛਾਲ ਮਾਰ ਕੇ ਬੋਨਟ ‘ਤੇ ਜਾ ਡਿੱਗੀ। ਕਾਰ ਅੱਗੇ ਜਾ ਕੇ ਦਰੱਖਤ ਨਾਲ ਟਕਰਾ ਗਈ, ਜਿਸ ਕਾਰਨ ਉਸ ਦੇ ਦੋ ਹਿੱਸੇ ਹੋ ਗਏ। ਪਰਮਜੀਤ ਦਾ ਸਿਰ ਕਾਰ ਦੇ ਅਗਲੇ ਟਾਇਰ ਵਿਚਕਾਰ ਫਸ ਗਿਆ ਅਤੇ ਉਸ ਦੀ ਹੇਠਲੀ ਲੱਤ ਕੱਟੀ ਗਈ। ਇਸ ਦੌਰਾਨ ਮਨਰਾਜ ਦੀ ਗਰਦਨ ਟੁੱਟ ਗਈ ਅਤੇ ਉਸ ਦੀ ਲਾਸ਼ ਦਰੱਖਤ ਕੋਲ ਪਈ ਸੀ। ਦਰੱਖਤ ਨਾਲ ਟਕਰਾਉਣ ਤੋਂ ਬਾਅਦ ਕਾਰ ਦੇ ਪਰਖੱਚੇ ਉੱਡ ਗਏ। ਜੋਬਨਜੀਤ ਸਿੰਘ ਦੀ ਲੱਤ ‘ਤੇ ਸੱਟ ਲੱਗੀ ਹੈ। ਉਸ ਦੀ ਲੱਤ ‘ਤੇ 8 ਟਾਂਕੇ ਲੱਗੇ ਹਨ ਅਤੇ ਉਹ ਸਿਵਲ ਹਸਪਤਾਲ ‘ਚ ਦਾਖਲ ਹੈ।